Konngol Harameeji Jeeɗiɗi

Konngol Harameeji Jeeɗiɗi

1.Buuɗal yurmeende Ƴellitiingal e binnde Geno !  

Yoo jam ñallu haa to ciimciimɗe-ma kaaɗi !

Hol mo wiynoo weetataa ?

Weetii haa cefe carfe cooye cariima caakiima e dow leydi wulii !

Haayoo Mbuuɗu naange feeñii, yayniima bannge puɗal !

Ɓesngu ina e wuro, jawdi ina sarii e ladde, duruunɗe, beeli Tuumaan e beeli Daari, Yo o yiitere‐ma reen!

8.Kala ko njiɗɗa min coodtirii ɗum Biigi baggi, gay dimaaɗi, e ƴiiƴam sagataaɓe!

Minen ɓiɓɓe Fulɓe min ngoondanii-ma

Harameeji jeeɗiɗi ɗi min pirtataa !

12.Goo :    min ngujjataa !

Ɗiɗi :       min penataa !

Tati :        min kulataa so     wonaa Geno !

Nay :        min njanfotaako !

Joy :         min taƴataa enɗam !

Jeegom :  min pirtataa aadi !

Jeeɗiɗi :   kala ko dañaa ina rennda, min ɗawataa!

19.Min piɓii ɗii ɗoo harameeji jeeɗiɗi, ɗi min pirtataa,

E laawol pulaaku ngol mi ndoni

E Baaba Kiikala kam woni maama kala

E Neene Naagara kam woni inna kala.

23.Min piɓii ɗii ɗoo harameeji jeeɗiɗi ɗi min pirtataa!

E barke kosam e nebam!

25.Min piɓii ɗii ɗoo harameeji jeeɗiɗi ɗi min pirtataa!

E yeeso Foroforondu !

Kam woni mawɗo sippooɓe!

Kam woni mooftu‐ɗo sirru burgal kelli, noddii Muuse! 

Kam jey ɓirdugal baddi, noddii Silikong!

Kam jey  lahal jaɓɓorgal  eeri!

Kam humpitii ko boloŋ e sumalle kasam kaalata!

35.Min piɓii ɗii ɗoo harameeji jeeɗiɗi ɗi min pirtataa!

E yeeso Kuumen kam woni mawɗo aynaaɓe!

Mo Geno-Dunndaari resndi durunɗe,

 Caalli e beeli, e daabaaji wuro e ladde! 

Kam wakkii sawru nelɓi, noddii Maysa!

Kam ardii ndurumbeele e waane, cabbi nay ndewi heen!

Kam soggi Jellinngeere, nge ardii jalli!

Kam soggi Yeenee, nge ardii wuule!

43.⁠ ⁠Min piɓii ɗii ɗoo harameeji jeeɗiɗi ɗi min pirtataa! 

Njanngaan ina heɗii, kam janngini aynooɓe sirru ngaynaaka!

Kundorong ina heɗtii, 

Kam  woni mo Geno-Dunndaari rokki ganndal ladde e ko woni e ladde!

Kam  soggiti  lelli e billi, forli  tewdi e koobi, Forliti eda e ndarwa  to ladde Tulaa-Heela!

49.Min piɓii ɗii ɗoo harameeji jeeɗɗi!

E toraade ndokkuwal Caamaaba funeere Ilo!

Baan, ba bacce kaŋŋe capanɗe jeenay e jeegom! 

Yoo min male  ɓesngu,  jawdi e cellal!

53.Min piɓii ɗii ɗoo harameeji jeeɗiɗi ɗi min pirtataa!

Keccel ina tawaa!

Kam Geno-Dunndaari resndi  huɗo e leɗɗe!

Gelooki wuura, nagge wooda, pullo wooda!

57.Min piɓii ɗii ɗo harameeji jeeɗiɗi ɗi min pirtataa!

Yo Geno-Dunndaari wuurnu-min, suura-min, dannda-min

No o danndirnoo ndaw e nder jereende Kama!

Ndaw reega, doga, ama, faddina e dow tule e ceene to 

Ngenndiije nano e ñaamo!

Gila njaajeeri cooya,  haa saahaal, haa ɓaleeri, haa maaje geej!

Kuɗol:   Dr. Amadou Sadio DIA & Dr. Amadou Oury DIALLO

Sawtawol: Hemmedu Ñaan, Duɗal Pulaar Kanada

Hoddu:  Fantang / Dege, Samba Cire Gorel Guisse.

Radio Daw Fm Canada.