Jaaltaaɓe

Ndeke Jaaltaaɓe ne kay suusaa Ngabu

Balla Jeerel e ngabu. Keyniraaɗo oo noon ko seeɗa feeñi e mum. Balla ko jontaaɗo no feewi. Wonaa mehre Jaaltaaɓe haɓiri e makko.

E nder njimri Baabooy Gellaay, gorko Aram Sahre ɓuri Goorumma(yo Alla yurmo mo kadi yaafoo mo), won ɗo o yimata heen jimol Balla Jeerel : ceɗɗo waawaa ndiyam. O yimii no Ceɗɗo ummorinoo gila Jolof, no ardi e wuro subalɓe, jippii e galle Jaaltaaɓe, Sammba-ngaari-maayo, daddo mo ñaamaa saayna haa e neemaaji ɗi tawnoo ɗoon. O haali heen hakkunde Balla e Faatimata, diwo joom wonngeela, gila e giɗli haa ɗo debbo cubballo oo felliti rokkude Balla sirluuji maayo. O daari heen hakkunde ɓiɓɓe jaaltaɓeeɓe nokku oo e Balla haa ɗo Ceɗɗo jeeri waroynoo ngabu. O wattindorii hare hakkunde Jaaltaaɓe e Balla haa ɗo ceɗɗo jeeri hooti rimndaani ɗoo. E nder hare ndee, jaaltaaɓe mooltii ko e ngabu, nagge ngabu mbonnatnoongu falo makko nguu. O wiyi yo ngu nanngan mo Balla Jeerel barannooɗo mo ngari ngabu mbonnatnoondi falo makko ndii, caggal nde ɓiɓɓe jaaltaɓeeɓe ndonki, coggaa no sefre baali………

E ko ɓooyaani koo, e darorɗe nduuɗoo lewru colte, hitaande 2012 nde ngonɗen ndee, gabi ndiddii subalɓe ɗiɗo ɗo diiwaan Sorimalee ɗoo. Gadano oo wonnoo ko e awde haa nani takkusaan ena eeree, joofi laana mum woni e juulde. Ɗoo o habbiri ɗoo tan haa ngabu suppitii e yeeso makko, ɗo woɗɗaani, fari. O rewni ngu gite haa o faayi wonde ko e makko ngu fayi , o wawliri noon : « feere am bonii, mi ɗaccii ɗo boni !»

Wonnooɓe e pale ɗo woɗɗaani e hoɗɓe e galleeji takkiiɗi maayo ngoo nde nani wulaango ngoo, ndogi ngari, cikkatnoo ko laana yiwi. Adinooɓe arde ɓee, ko ɓeen kawri e makko, omo faha, koyɗe mehe hay paɗo.